Wednesday, March 30, 2011

INNGILI JOZEFIMIK ATILIK

Massakkorpiaq kingusinnerusukkulluunniit angalasut kikkuugaluilluunniit piviusunngortissinnaavaat. Inngilit piviusuupput. Minnerpaamik inngilit angalasunik paaqqinnillutillu angalaqataasinnaapput. Ateqarneq ajoraluarlutik qaqutigut ateqartarput. Ataaseq Jozefimik ateqarpoq.

Nunani allani ilisimatuutut angalagaangama ilaagisannaara tassaavoq ilisimatooqatiga. Angalanerit pissanganartut ilaat tassaavoq Pragemi ukiumoortumik ataatsimeersuarnermut peqataanerput. Ilaanniaasiit angalagaangatta angallatigisartakkavut allanngortippavut, taavalu Bratislavaliarpugut qamutinut hiistinik qimuttulinnut ilaalluta ingerlaqatigiinnata kilometerit 300-t missiliorlugit ungasitsigisumiit, uangalu periarfissaqariarama aanngaalaarpunga. Iterlunga paasivara minuttini 15-ini akunnittarfimmi aqqusinersuup biiliinnaat aqqutaanniittumi qasuersitsiartoqalersoq. Tupaallaqalunga naapileriarpara ilisimatooqatiga kaffisuataannguartoq ilungersoqalunilu angummik ilisarisimanngisannik oqaloqateqartoq. Oqaloqatigisaa nalinginnaanngitsumik isikkoqarpoq. Ilumut taamaappoq. Takoqqaarlugu soorlu tassa "inuunermit ilungersortinneqangaarsimasoq." Tassa inuunermit ajornaatsuinnaanngitsumit. Nujai qaqortuupput kiinaalu assut eqisaluppoq. Oqaluttuarmat Rhodesiami sakkutuut naalagaattut, oberstitut, sulisimalluni, tamanna ilaatigut tupaallaatigivallaanngilara. Soorunami qaqutigoorluinnartuuvoq Slovakiamiuunera, kisianni oqaasii tamaasa tusaalerlugit qularnaatsumik paaseqqissaaraluttuinnarpara siuninnguatsinniittoq tassaasoq nunarsuarmi ungasissumut angalasartuik piviusoq.

Taamanikkut, 1990-ikkut aallartilaarneranni, naapinneq allamiorpasilluinnartuuvoq, pingaartumik ilisaarisimasartaatta imminut Jozefiunerartup, Afrika, Sri Lanka, India, Nepalilu oqaluttuarilermagit. Soorlu tassa akitsorterussisartoq naapiinnaripput. Nunallu taakkua tikeraassagaluarutsigit immikkut paasisimasalittut imminut piukkummat tamanna soorlu tassa illarsaarutigiinnaraa. Taava aningaasanik tigusissut plasticiusoq unnersuutilermagu uanga soqutiginnerujussuanngilanga. Angalaqatinnut tunniuppaa. Angalaqatiga ima paatsiveerusimaartartigaaq allaat isumaliorlunga katanngitsoornavianngikkaa. Taamatullumi pisoqarpoq.

Ukiuni arlalinni angut takornartaq sumilluunniit tusarfiginngilarput. Pisut iluanni ilisimatuutut paasisatsinnik allaaserisavut imak soqutigineqartigisimapput allaat Indiami ilisimatuut ataatsimeersuarnissaannut qaaqqusaanitsinnik kinguneqarlutik. Nalaatsornikkullu iluatsitsinitsigut nunamut tusaamasamut angalanissaq aningaasassarseriaratsigu Jozefitut piginnaanilimmik angalanissamillu immikkut paasisimasalimmik saaffigisassaqannginnerput ugguutigileraluttuinnarparput. Ilisimatooqatigali sap. ak. qassissunnguit qaangiuttut sianerfigineqarpoq. Ukiut qassiit Asiami angalareersimalluni Jozef Bratislavamut utersimavoq naapinnissarpullu kissaatigalugu.

Jozef isikkumigut allannguuteqarujussuarsimanngilaq. Nujai qeersuujupput. Kiinaa amequsunneruliinnarsimavoq. Oqaluttuai pisarnermissut sakkortutigisumik upperiuminaallutillu ingasattajaagaapput. Taava India pillugu siunnersorluarumallermatigut aallarnissatta tungaanut tallimanngornerit tamaasa ualikkut sap. ak. qassiialunnguani naapittartussanngorpugut.

Naggataagut tassa angalanissatsinnut piareerpugut. Tallimanngornermi kingullermi timmisartunnginnitsinni naggataamik ilitsersorneqarnissatsinnut inortuivunga angalaqatigisartagaralu paasissutissanik tamanik pisariaqartunik Jozefimit ilitsersuunneqareersimavoq anereersimallunilu. Oqallisissaqarpallaanngilagut. Jozefilu issiavugut tiitugarpullu najooqqarlugu. Imigassartunngisaannartuuvoq uangalu imerniartarfiup imigassaarniarfiani tiitunngisaannarpunga, taamaattumik naapisimaarnerput assut pikkunaappoq sivitsunngitsorlumi inuulluaqquniarlugu aalajangerpunga.

Taava Jozef oqarpoq, "Qaqugu timmisartussat New Delhiliarluni aallassava?"

"Tullianik pingasunngorpat."

"Qassinut apuutissava?"

"Ullo´qeqqata missaani New Delhimut apuussimaniartussaavugut."

Jozef eqqarsarpaluttumik isikkoqarpoq uangali nikuippunga inuulluaqquniarlugulu talera qullarpara, toqqarlungalu nakkunnanga eqqissisimaqaluni ima oqarpoq, "Ajunngilarmi, ajornavianngilaq, pingasunngoqqippat nal. 13.00 Akunnittarfimmi Imperialimi naapikkumaarpugut. Tamanna paasiiviuk?"

Sikisarpunga qimagullungalu. Upperissallugu ingasappallaarpoq. Pingasunngornermilu timmisartoqarfimmiit toqqaannartumik Akunnittarfik Imperial ornipparput. Jozefip tassani utaqqivaatigut. Piffissaq taanna aallartiffigalugu sap. ak. marlunni tulliuttuni ataatatsitut eqinnaangaarluni, saamangaarluni ilalaarlunilu ilisimasortaaffigaaatigut allanit tamanit pikkorinnerungaarluni.

Taava qanoq ilillunga paasivara Jozef inngiliusoq? Ikiuinerata pitsaaqataanik iliorfigisinnaannginnatsigu qutsavigisinnaanaguluunniit. Tassanngaannarmi tammavilluni nanissaajunnaarpoq. Taamanerniilli tusarfigeqqinngisaannarpara. Taamaallaat inngilit kisimik taamatut pissusilersortarput.

Suut tamarmik qaangiutereeraluit aamma illit inngilitut sulitsiarsinnaavutit. Isitit ammatikkit pisinnaaffikkullu inunnik angalasunik ikiuisarlutit. Allamik naamik, taamaallaat eqqaamassavat aatsaat ikiukkavit akiniarlutit iliorfigereeraangatsit qutsavigereeraangatsilluunniit qimaguttassagavit.

Allattoq atuakkiortoq Gustáv Murín

Tuluttuumiit kalaallisuunngortitsisoq Kristian Olsen aaju

No comments: